Allsherjarvinnustöðvun - fundargerð stjórnar og trúnaðarráðs FFÍ

Ár 2020, föstudaginn 17.7 kl. 16:45 kom stjórn og trúnaðarráð FFÍ saman til fundar.

Formaður félagsins, Guðlaug Líney Jóhannsdóttir, setti fund. Formaður samninganefndar, Sigrún Jónsdóttir, gerði grein fyrir stöðu kjaraviðræðna við Icelandair ehf. Hún gerði grein fyrir því að samninganefnd FFÍ hefði í ljósi þess að Icelandair ehf hefði opinberlega slitið viðræðum um endurnýjun kjarasamnings tilkynnt Ríkissáttasemjara fyrr í dag að hún teldi viðræður aðila árangurslausar þrátt fyrir milligöngu hans. Stjórn og trúnaðarráð var sammála þeirri afstöðu og að loknum umræðum var eftirfarandi tillaga um boðun vinnustöðvunar hjá Icelandair ehf.  lögð fram, kynnt og samþykkt:

Fundur stjórnar og trúnaðarráðs FFÍ, haldinn föstudaginn 17.7 2020 samþykkir að boða allsherjarvinnustöðvun félagsmanna hjá Icelandair ehf. Vinnustöðvunin verði ótímabundin og hefjist kl. 00:01 þriðjudaginn 4.8 2020 og tekur hún til allra starfa flugfreyja og flugþjóna um borð í flugvélum Icelandair ehf.

Atkvæðagreiðsla um boðun vinnustöðvunar hefjist kl. 10:00 að morgni 24.7 2020 og ljúki kl. 12:00 á hádegi 27.7 2020. Atkvæðagreiðslan verði rafræn.

Atkvæðisrétt hafi allir félagsmenn FFÍ sem Icelandair skilaði iðgjöldum af til félagsins skv. skilagreinum fyrir júní 2020.

Fleira ekki gert og var fundi slitið kl. 17:15

YFIRLÝSING VEGNA VIÐRÆÐUSLITA ICELANDAIR OG FFÍ

Kópavogi 17.07.2020

YFIRLÝSING VEGNA VIÐRÆÐUSLITA ICELANDAIR OG FFÍ

Stjórn og trúnaðarráð Flugfreyjufélags Íslands (FFÍ) fordæmir óvænt og einhliða viðræðuslit Icelandair sem birt voru í fjölmiðlum í dag.  Afstaða Icelandair setur FFÍ í þá afleitu stöðu að þurfa að hefja undirbúning að tafarlausum og víðtækum verkfallsaðgerðum.  FFÍ er aðili að Alþýðusambandi Íslands og alþjóðlegum verkalýðssamtökum og hefur fullan stuðning við aðgerðir sínar þar. Samstöðuaflinu verður beitt af fullum þunga.

„Það eru gríðarleg vonbrigði að Icelandair kalli eftir því að flugmenn gangi í störf félagsmanna FFÍ og ég neita að trúa því fyrr en ég tek á því að vinnufélagar okkar muni koma þannig fram við samstarfsfélaga sína um árabil.  Afstaða og viðhorf Icelandair í málinu eru til skammar og ég hef trú á að almenningur tekur slíkri lítilsvirðingu við launfólk ekki þegjandi og hljóðalaust,“ segir Guðlaug Líney Jóhannsdóttir, formaður Flugfreyjufélags Íslands.

Icelandair hefur á undanförnum mánuðum þegið háar fjárhæðir úr opinberum sjóðum og FFÍ væntir þess að málið verði tekið fyrir á vettvangi stjórnvalda hið fyrsta og geri þá kröfu til stjórnenda fyrirtækisins að þeir virði lög og leikreglur á íslenskum vinnumarkaði.